ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានស្នើមកកាន់រដ្ឋសភាដើម្បីកោះប្រជុំវិសាមញ្ញក្នុងការផ្ដល់សេចក្ដីទុកចិត្តលើសមាសភាពរាជរដ្ឋាភិបាលថ្មី ដោយក្នុងនោះរដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី ត្រូវបានស្នើតែងតាំងជាឧបនាយករដ្ឋមន្ត្រី។

នេះបើតាមការឲ្យដឹងពីអគ្គលេខាធិការនៃរដ្ឋសភា លោក ឡេង ប៉េងឡុង នៅព្រឹកថ្ងៃទី១៥ ខែកុម្ភៈ ឆ្នាំ២០២៤នេះ។

ក្រៅពីលោក ហ៊ុន ម៉ានី ដែលត្រូវស្នើតែងតាំងជាឧបនាយករដ្ឋមន្ត្រីក៏មានលោក ស្រី ថាមរ៉ុង្គ និងលោក ប៉ែន វិបុល ត្រូវបាននាយករដ្ឋមន្ត្រីស្នើតែងតាំងជាទេសរដ្ឋមន្ត្រីទទួលបន្ទុកបេសកកម្មពិសេសផងដែរ។

បើតាមលោក ឡេង ប៉េងឡុង សភានឹងកោះប្រជុំវិសាមញ្ញថ្ងៃទី២១ ខែកុម្ភៈ ខាងមុខដើម្បីបោះឆ្នោតផ្ដល់សេចក្តីទុកចិត្តលើសមាសភាពថ្មីនៃរដ្ឋាភិបាលដែលស្នើមកនេះ៕